7. นิสีทนสิกฺขาปทวณฺณนา

[531-536] สตฺตเม นิสีทนสฺส ปมาณาติกฺกนฺตตา, อตฺตโน กรณาทินา ปฏิลาโภติ ทฺเว องฺคานิฯ

นิสีทนสิกฺขาปทวณฺณนา นิฏฺฐิตาฯ

[537-547] อิมินา นเยน อฏฺฐมนวมทสเมสุปิ องฺคานิ เวทิตพฺพานิฯ เสสํ สพฺพตฺถ สุวิญฺเญยฺยเมวาติฯ

นิฏฺฐิโต ราชวคฺโค นวโมฯ

ขุทฺทกวณฺณนานโย นิฏฺฐิโตฯ

6. ปาฏิเทสนียกณฺฑํ

1. ปฐมปาฏิเทสนียสิกฺขาปทวณฺณนา

[553] ปาฏิเทสนีเยสุ ปฐเม ปฏิเทเสตพฺพาการทสฺสนนฺติ เอวํ อาปตฺติํ นวกสฺส สนฺติเก เทเสตพฺพาการทสฺสนํฯ อิมินา ลกฺขเณน สมฺพหุลานํ อาปตฺตีนมฺปิ วุฑฺฒสฺส สนฺติเก จ เทเสตพฺพากาโร สกฺกา วิญฺญาตุนฺติฯ ตตฺรายํ นโย – ‘‘คารยฺเห, อาวุโส, ธมฺเม อาปชฺชิํ อสปฺปาเย ปาฏิเทสนีเย’’ติ เอวํ สมฺพหุลาสุฯ วุฑฺฒสฺส ปน สนฺติเก ‘‘คารยฺหํ, ภนฺเต, ธมฺมํ…เป.… คารยฺเห, ภนฺเต, ธมฺเม’’ติ โยชนา เวทิตพฺพาฯ ตตฺถ อสปฺปายนฺติ สคฺคโมกฺขนฺตรายกรนฺติ อตฺโถฯ อญฺญาติกาย ภิกฺขุนิยา อนฺตรฆเร ฐิตาย หตฺถโต สหตฺถา ยาวกาลิกคฺคหณํ, อชฺโฌหรณนฺติ ทฺเว องฺคานิฯ

ปฐมปาฏิเทสนียสิกฺขาปทวณฺณนา นิฏฺฐิตาฯ

[558] ทุติเย ปริปุณฺณูปสมฺปนฺนาย อนนุญฺญาตากาเรน โวสาสนา, อนิวาเรตฺวา โภชนชฺโฌหาโรติ ทฺเว องฺคานิฯ

[563] ตติเย เสกฺขสมฺมตตา, ฆรูปจาเร อนิมนฺติตตา, คิลานสฺส อนิจฺจภตฺตาทิํ คเหตฺวา ภุญฺชนนฺติ ตีณิ องฺคานิฯ

[570] จตุตฺเถ สาสงฺการญฺญเสนาสนตา, อนนุญฺญาตํ ยาวกาลิกํ อปฺปฏิสํวิทิตํ อชฺฌาราเม ปฏิคฺคเหตฺวา อคิลานสฺส อชฺโฌหรณนฺติ ทฺเว องฺคานิฯ เสสํ อุตฺตานเมวฯ

ปาฏิเทสนียวณฺณนานโย นิฏฺฐิโตฯ